ਉੱਤਰ ਪ੍ਰਦੇਸ਼ ਦੇ ਝਾਂਸੀ ਵਿੱਚ ਇਕ ਨਵੀਂ ਚਾਹ ਦੀ ਦੁਕਾਨ ਖੁੱਲ੍ਹੀ ਹੈ। ਚਾਹ ਦੀ ਦੁਕਾਨ ਖੁੱਲ੍ਹਣਾ ਕੋਈ ਅਨੋਖੀ ਗੱਲ ਨਹੀਂ ਹੈ ਪਰ ਜੇਕਰ ਕੋਈ ਇੰਸਪੈਕਟਰ ਚਾਹ ਦੀ ਦੁਕਾਨ ਖੋਲ੍ਹਦਾ ਹੈ ਤਾਂ ਇਹ ਚਰਚਾ ਦਾ ਵਿਸ਼ਾ ਬਣ ਜਾਂਦਾ ਹੈ। ਜੀ ਹਾਂ, ਝਾਂਸੀ ‘ਚ ਮੁਅੱਤਲ ਚੱਲ ਰਹੇ ਇੰਸਪੈਕਟਰ ਮੋਹਿਤ ਯਾਦਵ ਨੇ ਐੱਸਐੱਸਪੀ ਦਫ਼ਤਰ ਨੇੜੇ ਚਾਹ ਦੀ ਦੁਕਾਨ ਖੋਲ੍ਹੀ ਹੈ। ਆਰਆਈ ਨਾਲ ਵਿਵਾਦ ਤੋਂ ਬਾਅਦ, ਇੰਸਪੈਕਟਰ ਮੋਹਿਤ ਯਾਦਵ ਨੂੰ ਮੁਅੱਤਲ ਕਰ ਦਿੱਤਾ ਗਿਆ ਸੀ ਅਤੇ ਵਿਭਾਗੀ ਜਾਂਚ ਸ਼ੁਰੂ ਕੀਤੀ ਗਈ ਸੀ।
ਮੈਂ ਤਨਖਾਹ ਨਹੀਂ ਲਵਾਂਗਾ, ਚਾਹ ਵੇਚ ਕੇ ਘਰ ਚਲਾਵਾਂਗਾ
ਮੁਅੱਤਲ ਇੰਸਪੈਕਟਰ ਮੋਹਿਤ ਯਾਦਵ ਨੇ ਦੱਸਿਆ ਕਿ ਉਸ ਨੇ ਆਪਣੇ ਪਰਿਵਾਰ ਦਾ ਪੇਟ ਭਰਨ ਲਈ ਇਹ ਦੁਕਾਨ ਖੋਲ੍ਹੀ ਹੈ। ਜਾਂਚ ਅਧਿਕਾਰੀ ਨੂੰ ਲਿਖੇ ਪੱਤਰ ਦਾ ਵੀ ਕੋਈ ਜਵਾਬ ਨਹੀਂ ਆਇਆ। ਮੇਰੇ ਅਤੇ ਮੇਰੀ ਪਤਨੀ ਦੇ ਫ਼ੋਨ ਟੈਪ ਕੀਤੇ ਜਾ ਰਹੇ ਹਨ। ਮੇਰੇ ਬੱਚੇ ਸਕੂਲ ਜਾਂਦੇ ਹਨ, ਅਜਿਹੇ ‘ਚ ਕੁਝ ਵੀ ਹੋ ਸਕਦਾ ਹੈ। ਮੈਂ ਡੀਆਈਜੀ ਦੇ ਦਫ਼ਤਰ ਵਿੱਚ ਦਰਖਾਸਤ ਦਿੱਤੀ ਹੈ ਕਿ ਮੈਂ ਮੁਅੱਤਲੀ ਦੇ ਸਮੇਂ ਦੌਰਾਨ ਅੱਧੀ ਤਨਖਾਹ ਵੀ ਨਹੀਂ ਲਵਾਂਗਾ। ਮੈਂ ਆਪਣਾ ਕਾਰੋਬਾਰ ਚਲਾਵਾਂਗਾ। ਮੈਂ ਆਪਣੇ ਘਰ ਦੇ ਖਰਚੇ ਚਾਹ ਦੀ ਦੁਕਾਨ ਤੋਂ ਹੀ ਚਲਾਵਾਂਗਾ।
ਮੁਅੱਤਲ ਇੰਸਪੈਕਟਰ ਮੋਹਿਤ ਯਾਦਵ ਦਾ 15 ਜਨਵਰੀ ਨੂੰ ਪੁਲਿਸ ਲਾਈਨ ਵਿੱਚ ਛੁੱਟੀ ਨੂੰ ਲੈ ਕੇ ਆਰਆਈ (ਕਾਊਂਟਰ ਇੰਸਪੈਕਟਰ) ਨਾਲ ਝਗੜਾ ਹੋਇਆ ਸੀ। ਇੰਸਪੈਕਟਰ ਮੋਹਿਤ ਯਾਦਵ ਨੇ ਦੋਸ਼ ਲਾਇਆ ਸੀ ਕਿ ਉਹ ਆਰਆਈ ਤੋਂ ਛੁੱਟੀ ਮੰਗਣ ਲਈ ਪੁਲਿਸ ਲਾਈਨ ਗਿਆ ਸੀ। ਆਰਆਈ ਨੇ ਉਸ ਨਾਲ ਦੁਰਵਿਵਹਾਰ ਕੀਤਾ ਅਤੇ ਉਸ ਦੇ ਗੁਪਤ ਅੰਗ ‘ਤੇ ਲੱਤ ਮਾਰ ਕੇ ਉਸ ਨੂੰ ਭਜਾ ਦਿੱਤਾ। ਪੁਲਿਸ ਲਾਈਨ ਵਿਚ ਹੋਏ ਝਗੜੇ ਤੋਂ ਬਾਅਦ ਇੰਸਪੈਕਟਰ ਨੇ ਪੁਲਿਸ ਨੂੰ ਬੁਲਾਇਆ ਸੀ, ਜਿਸ ਤੋਂ ਬਾਅਦ ਪੁਲਿਸ ਉਸ ਨੂੰ ਨਵਾਬਾਦ ਥਾਣੇ ਲੈ ਗਈ। ਇੱਥੇ ਸ਼ਿਕਾਇਤ ਲਿਖਣ ਲਈ ਮੋਹਿਤ ਜ਼ਮੀਨ ‘ਤੇ ਬੈਠ ਗਿਆ ਅਤੇ ਫੁੱਟ-ਫੁੱਟ ਕੇ ਰੋਣ ਲੱਗਾ। ਇਸ ਘਟਨਾ ਦੀ ਵੀਡੀਓ ਸੋਸ਼ਲ ਮੀਡੀਆ ‘ਤੇ ਵਾਇਰਲ ਹੋ ਗਈ।
ਇਸ ਮਾਮਲੇ ‘ਚ ਥਾਣਾ ਨਵਾਬਾਦ ਦੇ ਇੰਚਾਰਜ ਇੰਸਪੈਕਟਰ ਜਤਿੰਦਰ ਕੁਮਾਰ ਸਿੰਘ ਨੇ ਦੱਸਿਆ ਕਿ ਕਾਊਂਟਰ ਇੰਸਪੈਕਟਰ ਸੁਭਾਸ਼ ਸਿੰਘ ਨੇ ਸ਼ਿਕਾਇਤ ਦਿੱਤੀ ਸੀ ਕਿ ਉਹ ਪੁਲਿਸ ਲਾਈਨ ਦੇ ਕਾਊਂਟਿੰਗ ਦਫਤਰ ‘ਚ ਬੈਠੇ ਸਨ, ਜਦੋਂ ਮੋਹਿਤ ਯਾਦਵ ਆਇਆ। ਇਸ ਤੋਂ ਬਾਅਦ ਛੁੱਟੀ ਨੂੰ ਲੈ ਕੇ ਵਿਵਾਦ ਹੋ ਗਿਆ।
