Sell-Aid Desk 24/7- ਚੀਨ ਦੇ ਸਭ ਤੋਂ ਸੀਨੀਅਰ ਜਨਰਲ ਝਾਂਗ ਯੂਕਸੀਆ ‘ਤੇ ਅਮਰੀਕਾ ਨੂੰ ਚੀਨੀ ਪਰਮਾਣੂ ਹਥਿਆਰਾਂ ਦੀ ਜਾਣਕਾਰੀ ਦੇਣ ਦੇ ਦੋਸ਼ ਲੱਗੇ ਹਨ। ‘ਵਾਲ ਸਟ੍ਰੀਟ ਜਰਨਲ’ ਦੀ ਰਿਪੋਰਟ ਦੇ ਮੁਤਾਬਕ, ਸੀਨੀਅਰ ਜਨਰਲ ਨੇ ਪੈਸੇ ਅਤੇ ਤਰੱਕੀ ਦੇ ਲਾਲਚ ਵਿੱਚ ਗੁਪਤ ਜਾਣਕਾਰੀ ਅਮਰੀਕਾ ਨੂੰ ਸਾਂਝੀ ਕੀਤੀ ਹੈ।
ਸੀਨੀਅਰ ਜਨਰਲ ‘ਤੇ ਇਹ ਦੋਸ਼ ਸ਼ਨੀਵਾਰ, 24 ਜਨਵਰੀ ਨੂੰ ਇੱਕ ਬੰਦ ਕਮਰੇ ਵਿੱਚ ਹੋਈ ਬ੍ਰੀਫਿੰਗ ਦੌਰਾਨ ਲਗਾਏ ਗਏ, ਜਿਸ ਵਿੱਚ ਸੀਨੀਅਰ ਫੌਜੀ ਅਧਿਕਾਰੀ ਮੌਜੂਦ ਸਨ। ਇਸ ਦੇ ਤੁਰੰਤ ਬਾਅਦ ਚੀਨ ਦੇ ਰੱਖਿਆ ਮੰਤਰਾਲੇ ਨੇ ਝਾਂਗ ਦੇ ਖ਼ਿਲਾਫ਼ ਜਾਂਚ ਦਾ ਐਲਾਨ ਕਰ ਦਿੱਤਾ।
ਚੀਨ ਤੋਂ ਲੀਕ ਹੋਈ ਪਰਮਾਣੂ ਹਥਿਆਰਾਂ ਦੀ ਜਾਣਕਾਰੀ
ਚੀਨ ਦੇ ਰੱਖਿਆ ਮੰਤਰਾਲੇ ਨੇ ਕਿਹਾ, ‘ਝਾਂਗ ਯੂਕਸੀਆ ‘ਤੇ ਪਾਰਟੀ ਅਨੁਸ਼ਾਸਨ ਅਤੇ ਰਾਜ ਦੇ ਕਾਨੂੰਨ ਦੀ ਗੰਭੀਰ ਉਲੰਘਣਾ ਦਾ ਸ਼ੱਕ ਹੈ।’ ਹਾਲਾਂਕਿ, ਮੰਤਰਾਲੇ ਵੱਲੋਂ ਇਸ ਬਾਰੇ ਕੋਈ ਵਿਸਤ੍ਰਿਤ ਜਾਣਕਾਰੀ ਸਾਂਝੀ ਨਹੀਂ ਕੀਤੀ ਗਈ।
ਬ੍ਰੀਫਿੰਗ ਨਾਲ ਜੁੜੇ ਲੋਕਾਂ ਨੇ ‘ਵਾਲ ਸਟ੍ਰੀਟ ਜਰਨਲ’ ਨੂੰ ਦੱਸਿਆ, “ਝਾਂਗ ‘ਤੇ ਸਿਆਸੀ ਗਰੁੱਪ ਬਣਾਉਣ ਅਤੇ ਕਮਿਊਨਿਸਟ ਪਾਰਟੀ ਦੀ ਚੋਟੀ ਦੀ ਫੌਜੀ ਸੰਸਥਾ, ਸੈਂਟਰਲ ਮਿਲਟਰੀ ਕਮਿਸ਼ਨ ਵਿੱਚ ਆਪਣੀ ਤਾਕਤ ਦੀ ਗਲਤ ਵਰਤੋਂ ਕਰਨ ਦੇ ਦੋਸ਼ ਸਨ।”
ਅਧਿਕਾਰੀਆਂ ਨੇ ਇੱਕ ਸ਼ਕਤੀਸ਼ਾਲੀ ਮਿਲਟਰੀ ਪ੍ਰੋਕਿਓਰਮੈਂਟ ਏਜੰਸੀ ‘ਤੇ ਉਨ੍ਹਾਂ ਦੇ ਕੰਟਰੋਲ ਦੀ ਵੀ ਜਾਂਚ ਕੀਤੀ, ਜਿੱਥੇ ਉਨ੍ਹਾਂ ‘ਤੇ ਤਰੱਕੀ ਦੇ ਬਦਲੇ ਮੋਟੀ ਰਕਮ ਲੈਣ ਦੇ ਇਲਜ਼ਾਮ ਸਨ।
ਜਰਨਲ ਦੇ ਅਨੁਸਾਰ, ਸਭ ਤੋਂ ਗੰਭੀਰ ਦੋਸ਼ ਇਹ ਸੀ ਕਿ ਝਾਂਗ ਨੇ ਚੀਨ ਦੇ ਨਿਊਕਲੀਅਰ ਹਥਿਆਰਾਂ ਦੇ ਪ੍ਰੋਗਰਾਮ ਨਾਲ ਜੁੜਿਆ ਮੁੱਖ ਤਕਨੀਕੀ ਡੇਟਾ ਅਮਰੀਕਾ (ਯੂਨਾਈਟਿਡ ਸਟੇਟਸ) ਨੂੰ ਲੀਕ ਕੀਤਾ ਸੀ।
