ਕੀ ਤੁਸੀਂ ਯਕੀਨ ਕਰ ਸਕਦੇ ਹੋ ਕਿ ਇੱਕ ਗਾਂ ਕਰੋੜਾਂ ਰੁਪਏ ਦੀ ਹੋ ਸਕਦੀ ਹੈ? ਇਹ ਕੋਈ ਮਜ਼ਾਕ ਨਹੀਂ, ਸਗੋਂ ਸੱਚਾਈ ਹੈ! ਬ੍ਰਾਜ਼ੀਲ ‘ਚ ‘ਵਿਆਟੀਨਾ-19’ (viatina19 cow) ਨਾਂ ਦੀ ਨੇਲੋਰ ਗਾਂ 4 ਮਿਲੀਅਨ ਡਾਲਰ (ਕਰੀਬ 33 ਕਰੋੜ ਰੁਪਏ) ‘ਚ ਵਿਕੀ ਹੈ। ਹੁਣ ਸਵਾਲ ਪੈਦਾ ਹੁੰਦਾ ਹੈ ਕਿ ਇਹ ਗਾਂ ਇੰਨੀ ਮਹਿੰਗੀ ਕਿਉਂ ਹੈ? ਆਓ ਇਸ ਰਹੱਸ ਤੋਂ ਪਰਦਾ ਉਠਾਉਂਦੇ ਹਾਂ ਅਤੇ ਜਾਣਦੇ ਹਾਂ ਕਿ ਇਸ ਗਾਂ ਵਿੱਚ ਕੀ ਖਾਸ ਹੈ।
ਗਾਵਾਂ ਸਿਰਫ ਦੁੱਧ ਦੇਣ ਲਈ ਹੀ ਨਹੀਂ, ਬਲਕਿ ਕੁਝ ਵਿਸ਼ੇਸ਼ ਨਸਲਾਂ ਆਪਣੇ ਅਸਾਧਾਰਨ ਗੁਣਾਂ ਕਾਰਨ ਬਹੁਤ ਉੱਚੀਆਂ ਕੀਮਤਾਂ ਉਤੇ ਵਿਕਦੀਆਂ ਹਨ। ਦੁਨੀਆ ‘ਚ ਕਈ ਅਜਿਹੀਆਂ ਨਸਲਾਂ ਹਨ ਜੋ ਆਪਣੀਆਂ ਵਿਲੱਖਣ ਵਿਸ਼ੇਸ਼ਤਾਵਾਂ ਕਾਰਨ ਲੱਖਾਂ-ਕਰੋੜਾਂ ‘ਚ ਵਿਕਦੀਆਂ ਹਨ। ਜਾਪਾਨ ਦੀ ਵਾਗਯੂ ਅਤੇ ਭਾਰਤ ਦੀਆਂ ਬ੍ਰਾਹਮਣ ਗਾਵਾਂ ਇਸ ਦੀਆਂ ਉੱਤਮ ਉਦਾਹਰਣਾਂ ਹਨ। ਇਹ ਗਾਵਾਂ ਗਰਮੀਆਂ ਵਿੱਚ ਵੀ ਆਸਾਨੀ ਨਾਲ ਬਚ ਸਕਦੀਆਂ ਹਨ ਅਤੇ ਇਨ੍ਹਾਂ ਦੀ ਨਸਲ ਬਹੁਤ ਸ਼ੁੱਧ ਮੰਨੀ ਜਾਂਦੀ ਹੈ। ਇਹੀ ਕਾਰਨ ਹੈ ਕਿ ਦੁਨੀਆ ਭਰ ‘ਚ ਇਨ੍ਹਾਂ ਦੀ ਮੰਗ ਲਗਾਤਾਰ ਬਣੀ ਰਹਿੰਦੀ ਹੈ।
ਦੁਨੀਆ ਦੀ ਸਭ ਤੋਂ ਮਹਿੰਗੀ ਨੇਲੋਰ ਗਾਂ: ਵਿਆਟੀਨਾ-19
ਬ੍ਰਾਜ਼ੀਲ ਦੇ ਮਿਨਾਸ ਗੇਰੇਸ ‘ਚ ‘ਵਿਆਟੀਨਾ-19’ ਨਾਮ ਦੀ ਇਸ ਗਾਂ ਨੇ ਇਤਿਹਾਸ ਰਚ ਦਿੱਤਾ ਹੈ। ਇਹ ਹੁਣ ਤੱਕ ਦੀ ਸਭ ਤੋਂ ਮਹਿੰਗੀ ਨੇਲੋਰ ਨਸਲ ਦੀ ਗਾਂ ਬਣ ਗਈ ਹੈ। ਇਸ ਗਾਂ ਦਾ ਭਾਰ 1,101 ਕਿਲੋਗ੍ਰਾਮ ਹੈ, ਜੋ ਕਿ ਕਿਸੇ ਵੀ ਆਮ ਗਾਂ ਨਾਲੋਂ ਦੁੱਗਣਾ ਹੈ। ਇਹ ਗਾਂ ਨਾ ਸਿਰਫ ਆਪਣੀ ਉੱਚ ਕੀਮਤ ਲਈ ਮਸ਼ਹੂਰ ਹੈ, ਬਲਕਿ ਇਸ ਦੀ ਵਿਸ਼ੇਸ਼ ਸਰੀਰਕ ਬਣਤਰ ਵੀ ਇਸ ਨੂੰ ਦੁਨੀਆ ਦੀ ਸਭ ਤੋਂ ਵਿਲੱਖਣ ਗਾਂ ਬਣਾਉਂਦੀ ਹੈ।
ਗਿਨੀਜ਼ ਵਰਲਡ ਰਿਕਾਰਡ
‘ਵਿਆਟੀਨਾ-19’ ਨਾ ਸਿਰਫ ਸਭ ਤੋਂ ਮਹਿੰਗੀ ਗਾਂ ਹੈ, ਸਗੋਂ ਇਹ ਸੁੰਦਰਤਾ ਦੇ ਮਾਮਲੇ ਵਿਚ ਵੀ ਸਿਖਰ ਉਤੇ ਹੈ। ਉਸ ਨੇ ‘ਗਿਨੀਜ਼ ਵਰਲਡ ਰਿਕਾਰਡ’ ‘ਚ ਆਪਣਾ ਨਾਂ ਦਰਜ ਕਰਵਾਇਆ ਹੈ ਅਤੇ ‘ਚੈਂਪੀਅਨਜ਼ ਆਫ ਦਾ ਵਰਲਡ’ ਮੁਕਾਬਲੇ ‘ਚ ‘ਮਿਸ ਸਾਊਥ ਅਮਰੀਕਾ’ ਦਾ ਖਿਤਾਬ ਵੀ ਜਿੱਤਿਆ ਹੈ। ਇਸ ਦੀ ਚਿੱਟੀ, ਚਮਕਦਾਰ, ਲਚਕੀਲੀ ਚਮੜੀ ਅਤੇ ਉੱਚਾਈ ਇਸ ਨੂੰ ਹੋਰ ਵੀ ਖਾਸ ਬਣਾਉਂਦੀ ਹੈ। ਇਹਨਾਂ ਵਿਸ਼ੇਸ਼ਤਾਵਾਂ ਦੇ ਕਾਰਨ ਇਹ ਗਰਮ ਖੇਤਰਾਂ ਵਿੱਚ ਵਧੇਰੇ ਆਸਾਨੀ ਨਾਲ ਬਚ ਸਕਦੀ ਹੈ।
