‘ਚਾਂਦੀ ਬਣਾਏਗੀ ਅਮੀਰ’… ਰਿਚ ਡੈੱਡ ਪੁਅਰ ਡੈੱਡ ਦੇ ਲੇਖਕ ਨੇ ਦੱਸਿਆ ਮੰਤਰ; ਸੋਨੇ ਤੇ ਬਿਟਕੋਇਨ ‘ਤੇ ਕੀ ਬੋਲੇ?

 Sell-Aid Desk 24/7- ਫਾਈਨੈਂਸ਼ੀਅਲ ਪਲਾਨਿੰਗ ‘ਤੇ ਲਿਖੀ ਗਈ ਮਸ਼ਹੂਰ ਕਿਤਾਬ ‘ਰਿਚ ਡੈੱਡ ਪੁਅਰ ਡੈੱਡ’ (Rich Dad Poor Dad) ਦੇ ਲੇਖਕ ਰੌਬਰਟ ਕਿਓਸਾਕੀ (Robert Kiyosaki) ਇੱਕ ਵਾਰ ਫਿਰ ਚਰਚਾ ਵਿੱਚ ਹਨ। ਉਨ੍ਹਾਂ ਨੇ ਨਿਵੇਸ਼ਕਾਂ ਨੂੰ ਇੱਕ ਨਵੀਂ ਸਲਾਹ ਦਿੱਤੀ ਹੈ। ਕਿਓਸਾਕੀ ਅਕਸਰ ਲੋਕਾਂ ਨੂੰ ਨਿਵੇਸ਼ ਰਾਹੀਂ ਪੈਸਾ ਕਮਾਉਣ ਦੇ ਤਰੀਕੇ ਦੱਸਦੇ ਰਹਿੰਦੇ ਹਨ। ਇਸੇ ਲੜੀ ਤਹਿਤ ਉਨ੍ਹਾਂ ਨੇ ਇੱਕ ਨਵੀਂ ਪੋਸਟ ਸਾਂਝੀ ਕੀਤੀ ਹੈ, ਜਿਸ ਵਿੱਚ ਉਨ੍ਹਾਂ ਦੱਸਿਆ ਕਿ ਜੇਕਰ ਵਿਸ਼ਵ ਆਰਥਿਕਤਾ (ਵਰਲਡ ਇਕਨਾਮੀ) ਕਰੈਸ਼ ਵੀ ਹੋ ਜਾਵੇ ਤਾਂ ਵੀ ਅਮੀਰ ਕਿਵੇਂ ਬਣਿਆ ਜਾ ਸਕਦਾ ਹੈ।

ਕਿਓਸਾਕੀ ਨੇ ਸੋਸ਼ਲ ਮੀਡੀਆ ਪਲੇਟਫਾਰਮ ‘X’ (ਪਹਿਲਾਂ ਟਵਿੱਟਰ) ‘ਤੇ ਇੱਕ ਨਵੀਂ ਪੋਸਟ ਵਿੱਚ ਅਮਰੀਕੀ ਫੈਡਰਲ ਰਿਜ਼ਰਵ (US Fed) ਵੱਲੋਂ ਵਿਆਜ ਦਰਾਂ ਵਿੱਚ ਕਟੌਤੀ ਦੇ ਫੈਸਲੇ ਬਾਰੇ ਕਿਹਾ ਕਿ ਫੈੱਡ ਨੇ ਆਪਣੀਆਂ ਭਵਿੱਖ ਦੀਆਂ ਯੋਜਨਾਵਾਂ ਦਾ ਖੁਲਾਸਾ ਕਰ ਦਿੱਤਾ ਹੈ, ਜਿਸ ਨਾਲ ਮਹਿੰਗਾਈ ਵਧੇਗੀ। ਇਸ ਲਈ ਉਨ੍ਹਾਂ ਨੇ ਹੁਣ ਸੋਨਾ, ਚਾਂਦੀ, ਬਿਟਕੋਇਨ (Bitcoin) ਅਤੇ ਇਥੇਰੀਅਮ (Ethereum) ਖਰੀਦਣ ਦੀ ਸਲਾਹ ਦਿੱਤੀ ਹੈ।

ਕਿਓਸਾਕੀ ਨੇ ਅੱਗੇ ਕਿਹਾ ਕਿ ਚਾਂਦੀ ਦੀਆਂ ਕੀਮਤਾਂ ਅਸਮਾਨ ਨੂੰ ਛੂਹ ਰਹੀਆਂ ਹਨ। ਉਨ੍ਹਾਂ ਭਵਿੱਖਬਾਣੀ ਕੀਤੀ ਕਿ ਸਾਲ 2026 ਵਿੱਚ ਚਾਂਦੀ 200 ਡਾਲਰ ਪ੍ਰਤੀ ਔਂਸ ਤੱਕ ਪਹੁੰਚ ਸਕਦੀ ਹੈ, ਜੋ ਕਿ 2024 ਵਿੱਚ ਸਿਰਫ 20 ਡਾਲਰ ਪ੍ਰਤੀ ਔਂਸ ਦੇ ਭਾਅ ‘ਤੇ ਸੀ। ਉਨ੍ਹਾਂ ਨੇ ਚਾਂਦੀ ਨੂੰ ਮਾੜੇ ਸਮੇਂ ਦੌਰਾਨ ਅਮੀਰ ਬਣਨ ਦਾ ਸਭ ਤੋਂ ਵੱਡਾ ਸਾਧਨ ਦੱਸਿਆ ਹੈ। ਉਨ੍ਹਾਂ ਲਿਖਿਆ ਹੈ ਕਿ ਜਦੋਂ “ਨਕਲੀ ਆਰਥਿਕਤਾ” (Fake Economy) ਕਰੈਸ਼ ਹੋਵੇਗੀ ਤਾਂ ਉਹ ਲੋਕ ਅਮੀਰ ਬਣਨਗੇ ਜਿਨ੍ਹਾਂ ਕੋਲ ਇਹ ਸੰਪਤੀਆਂ ਹੋਣਗੀਆਂ। ਉਨ੍ਹਾਂ ਲੋਕਾਂ ਨੂੰ ਸਵਾਲ ਵੀ ਕੀਤਾ ਕਿ “ਤੁਸੀਂ ਕੀ ਕਰ ਰਹੇ ਹੋ?”, ਯਾਨੀ ਕਿ ਤੁਸੀਂ ਚਾਂਦੀ ਖਰੀਦ ਰਹੇ ਹੋ ਜਾਂ ਨਹੀਂ।