ਅੱਜ ਤੜਕੇ ਸੁਲਤਾਨਪੁਰ ਲੋਧੀ ਵਿੱਚ ਇੱਕ ਮੰਦਭਾਗੀ ਘਟਨਾ ਵਾਪਰੀ, ਜਦ ਇੱਕ ਪ੍ਰਸਿੱਧ ਰੈਡੀਮੇਡ ਕੱਪੜਿਆਂ ਦੇ ਸ਼ੋਅਰੂਮ ਨੂੰ ਅਚਾਨਕ ਅੱਗ ਲੱਗ ਗਈ। ਇਸ ਭਿਆਨਕ ਅੱਗ ਦੇ ਚਲਦਿਆਂ ਲੱਖਾਂ ਰੁਪਏ ਦਾ ਸਮਾਨ ਸੜ ਕੇ ਸਵਾਹ ਹੋ ਗਿਆ।
ਫਾਇਰ ਬ੍ਰਿਗੇਡ ਵੱਲੋਂ ਅੱਗ ਬੁਝਾਉਣ ਦੀ ਲਗਾਤਾਰ ਕੋਸ਼ਿਸ਼
ਇਸ ਤਿੰਨ ਮੰਜ਼ਿਲਾ ਸ਼ੋਅਰੂਮ ‘ਚ ਲੱਗੀ ਅੱਗ ਨੂੰ ਬੁਝਾਉਣ ਲਈ ਫਾਇਰ ਬ੍ਰਿਗੇਡ ਦੀਆਂ ਟੀਮਾਂ ਤੁਰੰਤ ਮੌਕੇ ‘ਤੇ ਪਹੁੰਚ ਗਈਆਂ। ਹੁਣ ਤੱਕ 6 ਅੱਗ ਬੁਝਾਉਣ ਵਾਲੀਆਂ ਗੱਡੀਆਂ ਮੌਕੇ ‘ਤੇ ਤੈਨਾਤ ਹਨ, ਪਰ ਫਿਰ ਵੀ ਅੱਗ ਤੇ ਪੂਰਾ ਕਾਬੂ ਨਹੀਂ ਪਾਇਆ ਜਾ ਸਕਿਆ। ਹਾਲਾਂਕਿ, ਅੱਜ ਤੱਕ ਅੱਗ ਲੱਗਣ ਦੇ ਕਾਰਨ ਦਾ ਕੋਈ ਸਪਸ਼ਟ ਕਾਰਨ ਸਾਹਮਣੇ ਨਹੀਂ ਆਇਆ।
ਸਵੇਰੇ 6:15 ਵਜੇ ਆਇਆ ਅੱਗ ਦਾ ਪਤਾ
ਜਾਣਕਾਰੀ ਮੁਤਾਬਕ, ਸਵੇਰੇ ਕਰੀਬ 6:15 ਵਜੇ ਕੁਝ ਸ਼ਹਿਰੀ ਵਾਸੀਆਂ ਨੇ ਸ਼ੋਅਰੂਮ ਤੋਂ ਧੂੰਆ ਨਿਕਲਦਾ ਦੇਖਿਆ। ਉਨ੍ਹਾਂ ਨੇ ਤੁਰੰਤ ਫਾਇਰ ਬ੍ਰਿਗੇਡ ਅਤੇ ਸ਼ੋਅਰੂਮ ਮਾਲਕ ਨੂੰ ਇਸ ਬਾਰੇ ਜਾਣਕਾਰੀ ਦਿੱਤੀ। ਫਾਇਰ ਬ੍ਰਿਗੇਡ ਦੀਆਂ ਟੀਮਾਂ ਤੁਰੰਤ ਮੌਕੇ ‘ਤੇ ਪਹੁੰਚੀਆਂ ਅਤੇ ਅੱਗ ਬੁਝਾਉਣ ਦੀ ਕੋਸ਼ਿਸ਼ ਸ਼ੁਰੂ ਕਰ ਦਿੱਤੀ। ਪਰ ਅੱਗ ਇੰਨੀ ਭਿਆਨਕ ਸੀ ਕਿ ਉਸ ਤੇ ਤੁਰੰਤ ਕਾਬੂ ਪਾਣਾ ਮੁਸ਼ਕਲ ਹੋ ਗਿਆ।
ਸ਼ੋਅਰੂਮ ਦਾ ਸਾਰਾ ਸਮਾਨ ਸੜ ਕੇ ਸੁਆਹ
ਦੁਕਾਨ ਮਾਲਕ ਦੇ ਰਿਸ਼ਤੇਦਾਰ ਨੇ ਦੱਸਿਆ ਕਿ ਦੁਕਾਨ ਮਾਲਕ ਦਾ ਭਤੀਜਾ ਬੀਤੀ ਰਾਤ ਦਿੱਲੀ ਤੋਂ ਨਵਾਂ ਮਾਲ ਲੈਣ ਗਇਆ ਸੀ। ਉਨ੍ਹਾਂ ਦੇ ਮੁਤਾਬਕ, ਅੱਗ ਲੱਗਣ ਕਾਰਨ ਸਾਰਾ ਕੱਪੜਾ, ਕਾਗਜ਼ਾਤ, ਨਗਦੀ ਅਤੇ ਹੋਰ ਉਪਕਰਣ ਸੜ ਕੇ ਸੁਆਹ ਹੋ ਗਏ। ਸ਼ੋਅਰੂਮ ਮਾਲਕ ਨੂੰ ਬਹੁਤ ਵੱਡਾ ਨੁਕਸਾਨ ਹੋਇਆ ਹੈ, ਜਿਸਦਾ ਅੰਦਾਜ਼ਾ ਉਸ ਦੇ ਭਤੀਜੇ ਦੇ ਵਾਪਸ ਆਉਣ ਉਪਰੰਤ ਹੀ ਲਗਾਇਆ ਜਾ ਸਕੇਗਾ।
ਵਪਾਰਕ ਪਰਿਵਾਰ ‘ਚ ਮਾਹੌਲ ਸੋਗਵਾਂ
ਸ਼ੋਅਰੂਮ ਮਾਲਕ ਦੇ ਪਰਿਵਾਰ ਨੇ ਕਿਹਾ ਕਿ ਉਨ੍ਹਾਂ ਨੇ ਬਹੁਤ ਮਿਹਨਤ ਕਰਕੇ ਇਹ ਮੁਕਾਮ ਹਾਸਲ ਕੀਤਾ ਸੀ, ਪਰ ਹੁਣ ਇਹ ਵੱਡਾ ਨੁਕਸਾਨ ਉਨ੍ਹਾਂ ਲਈ ਭਾਰੀ ਮਾਰ ਬਣ ਗਿਆ ਹੈ। ਉਹਨਾ ਲਈ ਮੁੜ ਇਸ ਝਟਕੇ ਤੋਂ ਉੱਠਣਾ ਬਹੁਤ ਮੁਸ਼ਕਲ ਹੋਵੇਗਾ।
