ਅਮਰੀਕੀ ਪੌਡਕਾਸਟਰ ਲੈਕਸ ਫਰੀਡਮੈਨ ਦਾ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨਾਲ 3 ਘੰਟੇ ਦਾ ਪੋਡਕਾਸਟ 16 ਮਾਰਚ ਨੂੰ ਪ੍ਰਸਾਰਿਤ ਕੀਤਾ ਜਾਵੇਗਾ। ਫਰੀਡਮੈਨ ਨੇ ਸੋਸ਼ਲ ਸਾਈਟ ਐਕਸ ‘ਤੇ ਇਹ ਜਾਣਕਾਰੀ ਦਿੱਤੀ ਹੈ। ਲੈਕਸ ਨੇ ਇਸ ਗੱਲਬਾਤ ਨੂੰ ਆਪਣੀ ਜ਼ਿੰਦਗੀ ਦੀ ਸਭ ਤੋਂ ਸ਼ਕਤੀਸ਼ਾਲੀ ਗੱਲਬਾਤ ਦੱਸਿਆ ਹੈ। ਉਨ੍ਹਾਂ ਨੇ ਐਕਸ ‘ਤੇ ਲਿਖਿਆ ਕਿ ਮੈਂ ਭਾਰਤ ਦੇ ਪ੍ਰਧਾਨ ਮੰਤਰੀ ਨਰਿੰਦਰ ਨਾਲ 3 ਘੰਟੇ ਦੀ ਐਪਿਕ ਪੋਡਕਾਸਟ ਗੱਲਬਾਤ ਕੀਤੀ। ਇਹ ਮੇਰੀ ਜ਼ਿੰਦਗੀ ਦੀ ਸਭ ਤੋਂ ਸ਼ਕਤੀਸ਼ਾਲੀ ਗੱਲਬਾਤ ਸੀ।
ਐਕਸ ‘ਤੇ ਫ੍ਰਿਡਮੈਨ ਦੀ ਪੋਸਟ ਦਾ ਜਵਾਬ ਦਿੰਦੇ ਹੋਏ, ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਕਿਹਾ, “ਇਹ @lexfridman ਨਾਲ ਅਸਲ ਵਿੱਚ ਇੱਕ ਦਿਲਚਸਪ ਗੱਲਬਾਤ ਸੀ। ਜਿਸ ਵਿੱਚ ਮੇਰਾ ਬਚਪਨ, ਹਿਮਾਲਿਆ ਵਿੱਚ ਬਿਤਾਏ ਸਾਲਾਂ ਅਤੇ ਜਨਤਕ ਜੀਵਨ ਵਿੱਚ ਮੇਰੀ ਯਾਤਰਾ ਸਮੇਤ ਵਿਭਿੰਨ ਵਿਸ਼ਿਆਂ ਨੂੰ ਸ਼ਾਮਲ ਕੀਤਾ ਗਿਆ ਸੀ। ਜ਼ਰੂਰ ਸੁਣੋ ਅਤੇ ਇਸ ਗੱਲਬਾਤ ਦਾ ਹਿੱਸਾ ਬਣੋ!”
ਤੁਹਾਨੂੰ ਦੱਸ ਦੇਈਏ ਕਿ ਪੋਡਕਾਸਟਰ ਪਿਛਲੇ ਮਹੀਨੇ ਪੀਐਮ ਮੋਦੀ ਦਾ ਇੰਟਰਵਿਊ ਲੈਣ ਭਾਰਤ ਆਏ ਸਨ। ਆਪਣੀ ਫੇਰੀ ਤੋਂ ਪਹਿਲਾਂ, ਫ੍ਰੀਡਮੈਨ ਨੇ ਭਾਰਤ ਦੇ ਇਤਿਹਾਸ ਸਮੇਤ ਕਈ ਵਿਸ਼ਿਆਂ ‘ਤੇ ਪ੍ਰਧਾਨ ਮੰਤਰੀ ਮੋਦੀ ਨਾਲ ਘੰਟੇ ਬਿਤਾਉਣ ਲਈ ਆਪਣੀ ਖੁਸ਼ੀ ਅਤੇ ਉਤਸੁਕਤਾ ਜ਼ਾਹਰ ਕੀਤੀ ਸੀ। ਉਸ ਸਮੇਂ ਫਰੀਡਮੈਨ ਨੇ ਕਿਹਾ ਸੀ ਕਿ ਪ੍ਰਧਾਨ ਮੰਤਰੀ ਮੋਦੀ ਉਨ੍ਹਾਂ ਸਭ ਤੋਂ ਮਨਮੋਹਕ ਇਨਸਾਨਾਂ ਵਿੱਚੋਂ ਇੱਕ ਹਨ ਜਿਨ੍ਹਾਂ ਨੂੰ ਮੈਂ ਕਦੇ ਪੜ੍ਹਿਆ ਹੈ।
ਫਰੀਡਮੈਨ ਨੇ 19 ਜਨਵਰੀ ਨੂੰ ਕੀਤਾ ਸੀ ਐਲਾਨ
ਇਸ ਤੋਂ ਪਹਿਲਾਂ 19 ਜਨਵਰੀ ਨੂੰ ਐਕਸ ‘ਤੇ ਇਕ ਪੋਸਟ ਰਾਹੀਂ ਫਰੀਡਮੈਨ ਨੇ ਪ੍ਰਧਾਨ ਮੰਤਰੀ ਮੋਦੀ ਦੀ ਇੰਟਰਵਿਊ ਲੈਣ ਦੀ ਆਪਣੀ ਯੋਜਨਾ ਦਾ ਐਲਾਨ ਕੀਤਾ ਸੀ। ਉਨ੍ਹਾਂ ਕਿਹਾ ਸੀ ਕਿ ਮੈਂ ਫਰਵਰੀ ਦੇ ਅੰਤ ‘ਚ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨਾਲ ਪੋਡਕਾਸਟ ਕਰਾਂਗਾ। ਮੈਂ ਕਦੇ ਵੀ ਭਾਰਤ ਨਹੀਂ ਗਿਆ, ਇਸ ਲਈ ਮੈਂ ਅੰਤ ਵਿੱਚ ਇਸ ਦੇ ਜੀਵੰਤ, ਇਤਿਹਾਸਕ ਸੱਭਿਆਚਾਰ ਅਤੇ ਇਸ ਦੇ ਸ਼ਾਨਦਾਰ ਲੋਕਾਂ ਦੇ ਬਹੁਤ ਸਾਰੇ ਪਹਿਲੂਆਂ ਦਾ ਪੂਰੀ ਤਰ੍ਹਾਂ ਅਨੁਭਵ ਕਰਨ ਲਈ ਉਤਸ਼ਾਹਿਤ ਹਾਂ।
