ਜਾਪਾਨ ਦੇ ਸੈਤਾਮਾ ਸੂਬੇ ਦੇ ਯਾਸ਼ੀਓ ਸ਼ਹਿਰ ਵਿੱਚ ਮੰਗਲਵਾਰ ਨੂੰ ਅਚਾਨਕ ਇੱਕ ਸਿੰਕਹੋਲ ਬਣ ਗਿਆ। ਇਸ ਕਾਰਨ ਇੱਕ ਟਰੱਕ ਡਰਾਈਵਰ ਇਸ ਵਿੱਚ ਫਸ ਗਿਆ। ਇਹ ਸਿੰਕਹੋਲ ਲਗਾਤਾਰ ਵਧਦਾ ਜਾ ਰਿਹਾ ਹੈ, ਜਿਸ ਕਾਰਨ ਬਚਾਅ ਕਾਰਜ ਮੁਸ਼ਕਿਲ ਹੋ ਰਹੇ ਹਨ। ਸਿੰਕਹੋਲ ਬਣਨ ਤੋਂ ਬਾਅਦ ਅਧਿਕਾਰੀਆਂ ਨੇ ਕਰੀਬ 200 ਘਰਾਂ ਨੂੰ ਖਾਲੀ ਕਰਨ ਦੇ ਹੁਕਮ ਦਿੱਤੇ ਹਨ।
ਮੰਗਲਵਾਰ ਸਵੇਰੇ ਯਾਸ਼ੀਓ ਸ਼ਹਿਰ ਦੇ ਇਕ ਚੌਰਾਹੇ ‘ਤੇ ਅਚਾਨਕ 10 ਮੀਟਰ ਚੌੜਾ ਅਤੇ 5 ਮੀਟਰ ਡੂੰਘਾ ਸਿੰਕਹੋਲ ਬਣ ਗਿਆ। ਇਸ ਸਿੰਕਹੋਲ ਵਿੱਚ ਇੱਕ ਟਰੱਕ ਫਸ ਗਿਆ, ਜਿਸ ਵਿੱਚ 74 ਸਾਲਾ ਡਰਾਈਵਰ ਫਸ ਗਿਆ।
ਡਰਾਈਵਰ ਨੇ ਮੰਗਲਵਾਰ ਦੁਪਹਿਰ ਤੱਕ ਬਚਾਅ ਕਰਮਚਾਰੀਆਂ ਨੂੰ ਜਵਾਬ ਦਿੱਤਾ ਸੀ, ਪਰ ਉਦੋਂ ਤੋਂ ਉਸ ਦੀ ਕੋਈ ਖਬਰ ਨਹੀਂ ਹੈ। ਬਚਾਅ ਟੀਮ ਨੇ ਟਰੱਕ ਦੇ ਪਿਛਲੇ ਹਿੱਸੇ ਨੂੰ ਸਿੰਖੋਲ ‘ਚੋਂ ਬਾਹਰ ਕੱਢ ਲਿਆ ਹੈ। ਪਰ ਟਰੱਕ ਡਰਾਈਵਰ ਦਾ ਕੈਬਿਨ ਅਜੇ ਵੀ ਮਲਬੇ ਹੇਠਾਂ ਦੱਬਿਆ ਹੋਇਆ ਹੈ।
ਅਧਿਕਾਰੀਆਂ ਦਾ ਮੰਨਣਾ ਹੈ ਕਿ ਸਿੰਕਹੋਲ ਬਣਨ ਦੇ ਪਿੱਛੇ ਇੱਕ ਜ਼ਮੀਨਦੋਜ਼ ਸੀਵਰੇਜ ਪਾਈਪ ਹੈ। ਇਸ ਪਾਈਪ ਵਿੱਚੋਂ ਨਿਕਲਣ ਵਾਲਾ ਪਾਣੀ ਸਿੰਖੋਲ ਵਿੱਚ ਭਰ ਗਿਆ, ਜਿਸ ਕਾਰਨ ਵੀਰਵਾਰ ਨੂੰ ਇੱਕ ਹੋਰ ਸਿੰਖੋਲ ਬਣ ਗਿਆ। ਦੋਵੇਂ ਸਿੰਕਹੋਲ ਹੁਣ ਲਗਭਗ 20 ਮੀਟਰ ਚੌੜੇ ਟੋਏ ਬਣਾਉਂਦੇ ਹਨ।
ਰੈਸਟੋਰੈਂਟ ਦਾ ਇਕ ਖੰਭਾ ਅਤੇ ਸਾਈਨ ਬੋਰਡ ਡਿੱਗਦਾ ਦਿਖਾਈ ਦੇ ਰਿਹਾ ਹੈ। ਦੂਸਰਾ ਟੋਆ ਬਣ ਜਾਣ ਕਾਰਨ ਇਹ ਬਚਾਅ ਕਾਰਜ ਹੋਰ ਵੀ ਗੁੰਝਲਦਾਰ ਹੋ ਗਿਆ ਹੈ। ਸਿੰਕਹੋਲ ਵਿੱਚ ਗੈਸ ਪਾਈਪ ਲਾਈਨ ਵੀ ਹੈ, ਜਿਸ ਕਾਰਨ ਗੈਸ ਲੀਕ ਹੋਣ ਦਾ ਖਤਰਾ ਵਧ ਗਿਆ ਹੈ।
ਸੜਕ ਅਤੇ ਜ਼ਮੀਨ ਖਿਸਕਣ ਦੀ ਸੰਭਾਵਨਾ ਕਾਰਨ ਅਧਿਕਾਰੀਆਂ ਨੇ ਆਸਪਾਸ ਦੇ ਇਲਾਕਿਆਂ ਵਿੱਚ ਰਹਿਣ ਵਾਲੇ ਲੋਕਾਂ ਨੂੰ ਪਾਣੀ ਦੀ ਘੱਟ ਵਰਤੋਂ ਕਰਨ ਦੀ ਸਲਾਹ ਦਿੱਤੀ ਹੈ।
ਤੁਸੀਂ ਦਿੱਲੀ ‘ਚ ਬਾਰਸ਼ ਦੌਰਾਨ ਸੜਕ ਧਸਣ ਦੇ ਮਾਮਲੇ ਜ਼ਰੂਰ ਦੇਖੇ ਹੋਣਗੇ। ਪਰ ਜਾਪਾਨ ਦੇ ਸ਼ਹਿਰਾਂ ਵਿੱਚ ਸਿੰਕਹੋਲ ਨਾਲ ਸਬੰਧਤ ਘਟਨਾਵਾਂ ਲਗਾਤਾਰ ਵੱਧ ਰਹੀਆਂ ਹਨ। ਇਸ ਦਾ ਇੱਕ ਵੱਡਾ ਕਾਰਨ ਪੁਰਾਣਾ ਸੀਵਰੇਜ ਅਤੇ ਪਾਈਪ ਲਾਈਨ ਸਿਸਟਮ ਹੈ।
ਸਾਲ 2016 ਵਿੱਚ ਫੁਕੂਓਕਾ ਸ਼ਹਿਰ ਵਿੱਚ ਇੱਕ ਵਿਸ਼ਾਲ ਸਿੰਕਹੋਲ ਬਣ ਗਿਆ ਸੀ। ਇਹ ਪੰਜ ਮਾਰਗੀ ਸੜਕ ਨੂੰ ਨਿਗਲ ਗਿਆ ਸੀ, ਜਿਸ ਕਾਰਨ ਬਿਜਲੀ, ਪਾਣੀ ਅਤੇ ਆਵਾਜਾਈ ਪ੍ਰਭਾਵਿਤ ਹੋਈ ਸੀ।
