ਅਹਿਮਦਾਬਾਦ ਵਿਚ ਕਾਨੂੰਨ ਦੇ ਇਕ ਵਿਦਿਆਰਥੀ ਦਾ ਹੈਲਮੇਟ ਨਾ ਪਾਉਣ ‘ਤੇ 10,00,500 ਰੁਪਏ ਦਾ ਚਲਾਨ ਕੱਟਿਆ ਗਿਆ। ਅਜਿਹਾ ਗਲਤ ਐਂਟਰੀ ਕਾਰਨ ਹੋਇਆ। ਗਲਤ ਐਂਟਰੀ ਕਾਰਨ ਹੈਲਮੇਟ ਨਾ ਪਾਉਣ ‘ਤੇ 500 ਰੁਪਏ ਦਾ ਜੁਰਮਾਨਾ 10,00,500 ਰੁਪਏ ਵਿੱਚ ਬਦਲ ਗਿਆ। ਅਨਿਲ ਹਦਿਆ ਪਿਛਲੇ ਸਾਲ ਅਪ੍ਰੈਲ ‘ਚ ਸ਼ਾਂਤੀਪੁਰਾ ਸਰਕਲ ‘ਚ ਬਿਨਾਂ ਹੈਲਮੇਟ ਬਾਈਕ ਚਲਾਉਂਦੇ ਫੜਿਆ ਗਿਆ ਸੀ। ਮਾਮਲਾ ਅਦਾਲਤ ਤੱਕ ਪਹੁੰਚ ਗਿਆ ਅਤੇ ਟਾਈਪਿੰਗ ਦੀ ਗਲਤੀ ਕਾਰਨ ਨੌਜਵਾਨ ਦੀਆਂ ਮੁਸ਼ਕਲਾਂ ਵਧ ਗਈਆਂ। ਪੁਲਿਸ ਖੁਦ ਇਸ ਮਾਮਲੇ ਵਿੱਚ ਆਪਣੀ ਗਲਤੀ ਮੰਨ ਰਹੀ ਹੈ।
ਅਨਿਲ ਹਦਿਆ ਨੇ ਦੱਸਿਆ, “ਪੁਲਿਸ ਨੇ ਮੇਰੀ ਫੋਟੋ ਕਲਿੱਕ ਕੀਤੀ ਅਤੇ ਲਾਇਸੈਂਸ ਨੰਬਰ ਨੋਟ ਕੀਤਾ। ਬਾਅਦ ਵਿੱਚ ਮੈਨੂੰ ਪਤਾ ਲੱਗਾ ਕਿ ਮੇਰਾ ਚਲਾਨ ਕੀਤਾ ਗਿਆ ਹੈ। ਮੈਂ ਸ਼ਾਂਤੀਪੁਰਾ ਸਰਕਲ ਟ੍ਰੈਫਿਕ ਪੁਲਿਸ ਕੋਲ ਗਿਆ, ਜਿੱਥੇ ਮੈਨੂੰ ਔਨਲਾਈਨ ਭੁਗਤਾਨ ਕਰਨ ਲਈ ਕਿਹਾ ਗਿਆ। ਕੁਝ ਦਿਨਾਂ ਬਾਅਦ, ਮੈਂ ਇਸ ਬਾਰੇ ਭੁੱਲ ਗਿਆ। ਹਾਲ ਹੀ ਵਿੱਚ, ਜਦੋਂ ਮੈਂ ਆਪਣੀ ਬਾਈਕ ਉਤੇ ਕਿਸੇ ਕੰਮ ਲਈ ਆਰਟੀਓ ਗਿਆ ਤਾਂ ਉੱਥੇ ਮੇਰੇ ਨਾਮ ਤੋਂ ਚਾਰ ਚਲਾਨ ਸਨ। ਤਿੰਨ ਚਲਾਨ ਤਾਂ ਭਰ ਦਿੱਤੇ, ਪਰ ਚੌਥਾ ਨਹੀਂ ਭਰਿਆ ਗਿਆ।” 8 ਮਾਰਚ ਨੂੰ, ਜਦੋਂ ਅਨਿਲ ਨੇ ਓਧਵ ਪੁਲਿਸ ਤੋਂ ਅਦਾਲਤੀ ਸੰਮਨ ਪ੍ਰਾਪਤ ਕਰਨ ਤੋਂ ਬਾਅਦ ਚਲਾਨ ਦੀ ਜਾਂਚ ਕੀਤੀ, ਤਾਂ ਇਹ ਪਾਇਆ ਗਿਆ ਕਿ 500 ਰੁਪਏ ਦੇ ਚਲਾਨ ਦੇ ਬਜਾਏ, 10,00,500 ਰੁਪਏ ਦਾ ਚਲਾਨ ਜਾਰੀ ਕਰ ਦਿੱਤਾ ਗਿਆ।
“ਮੈਂ ਅਤੇ ਮੇਰਾ ਪਰਿਵਾਰ ਇਸ ਰਕਮ ਨੂੰ ਕਿਵੇਂ ਵਾਪਸ ਕਰਾਂਗੇ?”
ਲਾਅ ਦੇ ਚੌਥੇ ਸਮੈਸਟਰ ਦੇ ਵਿਦਿਆਰਥੀ ਅਨਿਲ ਨੇ ਕਿਹਾ, “ਮੇਰੇ ਪਿਤਾ ਇੱਕ ਛੋਟੇ ਕਾਰੋਬਾਰੀ ਹਨ। ਜੇਕਰ ਅਦਾਲਤ ਸਾਨੂੰ 10 ਲੱਖ ਰੁਪਏ ਦਾ ਭੁਗਤਾਨ ਕਰਨ ਲਈ ਕਹਿੰਦੀ ਹੈ, ਤਾਂ ਅਸੀਂ ਇਸ ਦਾ ਭੁਗਤਾਨ ਕਿਵੇਂ ਕਰਾਂਗੇ?” ਪਰੇਸ਼ਾਨ ਅਨਿਲ ਮੰਗਲਵਾਰ ਨੂੰ ਮੈਟਰੋਪੋਲੀਟਨ ਕੋਰਟ ਪਹੁੰਚਿਆ ਅਤੇ ਸਮਾਜਿਕ ਕਾਰਕੁਨ ਹਰਸ਼ਦ ਪਟੇਲ ਦੇ ਨਾਲ ਪੁਲਿਸ ਕਮਿਸ਼ਨਰ ਦਫ਼ਤਰ ਵੀ ਗਿਆ। ਉੱਥੇ ਸਟਾਫ ਨੇ ਉਸ ਨੂੰ ਡਾਕ ਰਾਹੀਂ ਸ਼ਿਕਾਇਤ ਦਰਜ ਕਰਵਾਉਣ ਲਈ ਕਿਹਾ।
ਪੁਲਿਸ ਨੇ ਗਲਤੀ ਮੰਨ ਲਈ ਹੈ
ਸੰਯੁਕਤ ਪੁਲਿਸ ਕਮਿਸ਼ਨਰ (ਟਰੈਫਿਕ) ਐਨਐਨ ਚੌਧਰੀ ਨੇ ਕਿਹਾ, “90 ਦਿਨਾਂ ਬਾਅਦ ਅਦਾਲਤ ਵਿੱਚ ਭੇਜੇ ਗਏ ਚਲਾਨ ਵਿੱਚ ਐਂਟਰੀ ਦੌਰਾਨ ਕੋਈ ਗਲਤੀ ਜ਼ਰੂਰ ਹੋਈ ਹੋਵੇਗੀ। ਅਸੀਂ ਅਦਾਲਤ ਨੂੰ ਸੂਚਿਤ ਕਰਾਂਗੇ ਅਤੇ ਇਸ ਨੂੰ ਸੁਧਾਰਾਂਗੇ। ਜਾਂਚ ਕੀਤੀ ਜਾਵੇਗੀ ਕਿ ਗਲਤੀ ਕਿਸ ਪੜਾਅ ‘ਤੇ ਹੋਈ ਹੈ।” ਉਨ੍ਹਾਂ ਭਰੋਸਾ ਦਿੱਤਾ ਕਿ ਇਸ ਮਾਮਲੇ ਵਿੱਚ ਵਿਦਿਆਰਥੀਆਂ ਨੂੰ ਚਿੰਤਾ ਕਰਨ ਦੀ ਲੋੜ ਨਹੀਂ ਹੋਵੇਗੀ।
