CM Rekha Gupta Old House: ਹਰਿਆਣਾ ਦੇ ਚਰਖੀ ਦਾਦਰੀ ਦੇ ਪਿੰਡ ਬੌਂਦ ਕਲਾਂ ਦੀ ਨੂੰਹ ਰੇਖਾ ਗੁਪਤਾ ਹੁਣ ਦਿੱਲੀ ਦੀ ਮੁੱਖ ਮੰਤਰੀ ਬਣ ਗਈ ਹੈ। ਇਸ ਖਬਰ ਨਾਲ ਉਸ ਦੇ ਸਹੁਰਾ ਪਰਿਵਾਰ ‘ਚ ਖੁਸ਼ੀ ਦੀ ਲਹਿਰ ਦੌੜ ਗਈ ਹੈ। ਰੇਖਾ ਗੁਪਤਾ ਦੇ ਮੁੱਖ ਮੰਤਰੀ ਬਣਨ ਉਤੇ ਉਨ੍ਹਾਂ ਦੇ ਪਰਿਵਾਰ ਨੇ ਮਠਿਆਈਆਂ ਵੰਡ ਕੇ ਜਸ਼ਨ ਮਨਾਇਆ।
ਰੇਖਾ ਗੁਪਤਾ ਦੇ ਪਤੀ ਦੇ ਪੜਦਾਦਾ ਸਾਧੂ ਰਾਮ ਅਤੇ ਹੋਰ ਪਰਿਵਾਰਕ ਮੈਂਬਰ ਕਾਰੋਬਾਰ ਕਾਰਨ ਕਰੀਬ 70 ਸਾਲ ਪਹਿਲਾਂ ਬੌਂਦ ਕਲਾਂ ਤੋਂ ਦਿੱਲੀ ਚਲੇ ਗਏ ਸਨ। ਹਾਲਾਂਕਿ ਪਰਿਵਾਰਕ ਮੈਂਬਰ ਪਿੰਡ ਆਉਂਦੇ-ਜਾਂਦੇ ਰਹਿੰਦੇ ਹਨ ਅਤੇ ਕੁਝ ਸਾਲ ਪਹਿਲਾਂ ਆਪਣੇ ਰਿਸ਼ਤੇਦਾਰਾਂ ਨੂੰ ਮਿਲਣ ਵੀ ਪਿੰਡ ਆਏ ਸਨ। ਹੁਣ ਸਹੁਰਾ ਪਰਿਵਾਰ ਪਿੰਡ ਵਿਚ ਪ੍ਰੋਗਰਾਮ ਕਰ ਕੇ ਨੂੰਹ ਦਾ ਸਨਮਾਨ ਕਰੇਗਾ।
ਗੁਆਂਢੀ ਹੰਸਰਾਜ ਸੇਠ ਅਤੇ ਸ਼ਿਓਰਾਜ ਸਿੰਘ ਨੇ ਕਿਹਾ ਕਿ ਰੇਖਾ ਗੁਪਤਾ ਦਾ ਦਿੱਲੀ ਦੀ ਮੁੱਖ ਮੰਤਰੀ ਬਣਨਾ ਉਨ੍ਹਾਂ ਦੇ ਪਰਿਵਾਰ ਅਤੇ ਇਲਾਕੇ ਲਈ ਮਾਣ ਵਾਲੀ ਗੱਲ ਹੈ। ਉਨ੍ਹਾਂ ਦੱਸਿਆ ਕਿ ਪਰਿਵਾਰ ਅਤੇ ਪਿੰਡ ਵਾਸੀ ਕੁਝ ਦਿਨਾਂ ਬਾਅਦ ਰੇਖਾ ਗੁਪਤਾ ਨੂੰ ਦਿੱਲੀ ਵਿਖੇ ਮਿਲਣਗੇ ਅਤੇ ਉਨ੍ਹਾਂ ਨੂੰ ਪਿੰਡ ਬੁਲਾ ਕੇ ਸਨਮਾਨ ਸਮਾਰੋਹ ਕਰਨਗੇ। ਹੰਸਰਾਜ ਨੇ ਦੱਸਿਆ ਕਿ ਇਹ ਲੋਕ 70 ਸਾਲ ਪਹਿਲਾਂ ਇੱਥੋਂ ਸ਼ਿਫਟ ਹੋਏ ਸਨ।
ਸ਼ਿਓਰਾਜ ਸਿੰਘ ਨੇ ਕਿਹਾ ਕਿ ਗੁਆਂਢੀ ਨਿਵਾਸੀ ਰੇਖਾ ਗੁਪਤਾ ਦਿੱਲੀ ਦੀ ਸੀ.ਐਮ ਬਣ ਗਈ ਹੈ। ਉਮੀਦ ਹੈ ਕਿ ਉਹ ਦਿੱਲੀ ਨੂੰ ਤਰੱਕੀ ਦੇ ਰਾਹ ‘ਤੇ ਲੈ ਕੇ ਜਾਵੇਗੀ।
ਘਰ ਹੁਣ ਖੰਡਰ ਹੋ ਚੁੱਕਾ ਹੈ
ਇੱਥੇ ਰੇਖਾ ਗੁਪਤਾ ਦਾ ਜੱਦੀ ਘਰ ਹੁਣ ਖੰਡਰ ਵਿੱਚ ਬਦਲ ਗਿਆ ਹੈ। ਘਰ ਦੀ ਹਾਲਤ ਬਹੁਤ ਖਸਤਾ ਹੈ ਅਤੇ ਪਿੰਡ ਵਾਸੀ ਹੁਣ ਇੱਥੇ ਮੰਦਰ ਬਣਾਉਣਾ ਚਾਹੁੰਦੇ ਹਨ। ਹੰਸ ਰਾਜ ਨੇ ਪੱਤਰਕਾਰਾਂ ਨੂੰ ਘਰ ਵੀ ਦਿਖਾਇਆ। ਇਸ ਦੌਰਾਨ ਪਿੰਡ ਦੇ ਲੋਕ ਵੀ ਇੱਕ ਥਾਂ ਇਕੱਠੇ ਹੋਏ ਅਤੇ ਆਪਣੀ ਬੇਟੀ ਦੇ ਮੁੱਖ ਮੰਤਰੀ ਬਣਨ ‘ਤੇ ਖੁਸ਼ੀ ਦਾ ਇਜ਼ਹਾਰ ਕੀਤਾ ਅਤੇ ਮਠਿਆਈਆਂ ਵੀ ਵੰਡੀਆਂ। ਜ਼ਿਕਰਯੋਗ ਹੈ ਕਿ ਰੇਖਾ ਗੁਪਤਾ ਦਾ ਜਨਮ ਜੀਂਦ ਜ਼ਿਲ੍ਹੇ ਦੇ ਪਿੰਡ ਨੰਦਗੜ੍ਹ ਵਿੱਚ ਹੋਇਆ ਸੀ। ਉਨ੍ਹਾਂ ਦੇ ਪਿਤਾ ਇੱਕ ਬੈਂਕ ਵਿੱਚ ਮੈਨੇਜਰ ਸਨ ਅਤੇ ਪਤੀ ਦਿੱਲੀ ਵਿੱਚ ਕਾਰੋਬਾਰ ਕਰਦਾ ਹੈ।
