ਸ਼ਰਧਾਲੂਆਂ ਨੇ ਕਿਹਾ ਕਿ ਗਊ ਮਾਤਾ ਨੂੰ ਚਾਰਾ ਖੁਆਉਣ ਨਾਲ ਪਰਿਵਾਰ ਵਿੱਚ ਆਰਥਿਕ ਤੰਗੀ ਦੂਰ ਹੁੰਦੀ ਹੈ ਅਤੇ ਸੰਤਾਨ ਸੁਖ ਪ੍ਰਾਪਤ ਹੁੰਦਾ ਹੈ। ਕਈ ਲੋਕਾਂ ਨੇ ਇਸ ਮੌਕੇ ‘ਤੇ ਵ੍ਰਤ ਰੱਖਿਆ ਅਤੇ ਸਵੇਰ ਤੋਂ ਹੀ ਗਊਸ਼ਾਲਾਵਾਂ ਵਿੱਚ ਦਰਸ਼ਨ ਕਰਕੇ ਆਸ਼ੀਰਵਾਦ ਲਿਆ।
ਜਤਿੰਦਰ ਮੋਹਨ, ਪਠਾਨਕੋਟ
ਅੱਜ ਗੋਪਾਲ ਅਸ਼ਟਮੀ ਦੇ ਪਵਿੱਤਰ ਪਾਵਨ ਦਿਨ ‘ਤੇ ਪੂਰੇ ਦੇਸ਼ ਵਿੱਚ ਗਊ ਮਾਤਾ ਦੀ ਪੂਜਾ ਅਰਚਨਾ ਨਾਲ ਸ਼ਰਧਾ ਦਾ ਮਾਹੌਲ ਬਣਿਆ ਹੋਇਆ ਹੈ। ਗੋਪਾਲ ਅਸ਼ਟਮੀ ਦੀ ਮਨਾਉਣ ਦੀ ਪਰੰਪਰਾ ਦਵਾਪਰ ਯੁੱਗ ਤੋਂ ਚਲੀ ਆ ਰਹੀ ਹੈ। ਧਾਰਮਿਕ ਗ੍ਰੰਥਾਂ ਅਨੁਸਾਰ, ਇਸ ਦਿਨ ਭਗਵਾਨ ਸ੍ਰੀ ਕ੍ਰਿਸ਼ਨ ਜੀ ਸਭ ਤੋਂ ਪਹਿਲੀ ਵਾਰ ਗਾਵਾਂ ਚਰਾਉਣ ਗਏ ਸਨ। ਇਸ ਕਾਰਨ ਹੀ ਕਾਰਤਿਕ ਮਹੀਨੇ ਦੀ ਸ਼ੁਕਲ ਅਸ਼ਟਮੀ ਨੂੰ ਗੋਪਾਲ ਅਸ਼ਟਮੀ ਵਜੋਂ ਮਨਾਇਆ ਜਾਂਦਾ ਹੈ।
ਭਾਗਵਤ ਪੁਰਾਣ ਦੇ ਅਨੁਸਾਰ, ਸਮੁੰਦਰ ਮੰਥਨ ਦੇ ਸਮੇਂ ਜਦੋਂ ਅਨੇਕਾਂ ਦਿਵ੍ਯ ਚੀਜ਼ਾਂ ਪ੍ਰਕਟ ਹੋਈਆਂ, ਉਨ੍ਹਾਂ ਵਿੱਚੋਂ ਇੱਕ ਕਾਮਧੇਨੂ ਗਾਂ ਵੀ ਸੀ। ਕਿਹਾ ਜਾਂਦਾ ਹੈ ਕਿ ਕਾਮਧੇਨੂ ਗਾਂ ਸਭ ਤੋਂ ਪਵਿੱਤਰ ਅਤੇ ਦਾਨਸ਼ੀਲ ਮੰਨੀ ਜਾਂਦੀ ਹੈ। ਰਿਸ਼ੀ-ਮੁਨੀਆਂ ਨੇ ਇਸਦੀ ਮਹੱਤਾ ਨੂੰ ਸਮਝਦਿਆਂ ਇਸਨੂੰ ਆਪਣੇ ਆਸ਼ਰਮਾਂ ਵਿੱਚ ਰੱਖਿਆ ਅਤੇ ਇਸਦੀ ਪੂਜਾ ਕਰਨ ਦੀ ਪ੍ਰਥਾ ਸ਼ੁਰੂ ਕੀਤੀ। ਹਿੰਦੂ ਧਰਮ ਵਿੱਚ ਗਊ ਮਾਤਾ ਨੂੰ ਵਿਸ਼ੇਸ਼ ਆਦਰ ਪ੍ਰਾਪਤ ਹੈ ਕਿਉਂਕਿ ਮੰਨਿਆ ਜਾਂਦਾ ਹੈ ਕਿ ਇਸਦੇ ਅੰਦਰ 33 ਕਰੋੜ ਦੇਵਤਿਆਂ ਦਾ ਨਿਵਾਸ ਹੈ।
ਗੋਪਾਲ ਅਸ਼ਟਮੀ ਦੇ ਮੌਕੇ ‘ਤੇ ਅੱਜ ਪਠਾਨਕੋਟ ਦੀ ਕਾਮਧੇਨੂ ਗਊਸ਼ਾਲਾ ਵਿੱਚ ਵਿਸ਼ੇਸ਼ ਸਮਾਗਮ ਆਯੋਜਿਤ ਕੀਤਾ ਗਿਆ। ਗਊ ਭਗਤਾਂ ਵੱਲੋਂ ਸਵੇਰੇ ਸਵੇਰੇ ਕੀਰਤਨ ਕੀਤੇ ਗਏ, ਗਊ ਮਾਤਾ ਦੀ ਅਰਚਨਾ ਕੀਤੀ ਗਈ ਅਤੇ ਧੂਪ, ਦੀਵੇ ਅਤੇ ਚਾਰੇ ਦੀ ਭੇਟ ਦਿੱਤੀ ਗਈ। ਗਊ ਸੇਵਕਾਂ ਨੇ ਦੱਸਿਆ ਕਿ ਗੋਪਾਲ ਅਸ਼ਟਮੀ ਦੇ ਦਿਨ ਗਊ ਮਾਤਾ ਦੀ ਪੂਜਾ ਕਰਨ ਨਾਲ ਮਨੁੱਖ ਦੇ ਅਨੇਕਾਂ ਪਾਪ ਦੂਰ ਹੁੰਦੇ ਹਨ ਅਤੇ ਜੀਵਨ ਵਿੱਚ ਸੁਖ, ਸ਼ਾਂਤੀ ਅਤੇ ਖੁਸ਼ਹਾਲੀ ਆਉਂਦੀ ਹੈ।
ਸਥਾਨਕ ਸ਼ਰਧਾਲੂਆਂ ਨੇ ਕਿਹਾ ਕਿ ਗਊ ਮਾਤਾ ਨੂੰ ਚਾਰਾ ਖੁਆਉਣ ਨਾਲ ਪਰਿਵਾਰ ਵਿੱਚ ਆਰਥਿਕ ਤੰਗੀ ਦੂਰ ਹੁੰਦੀ ਹੈ ਅਤੇ ਸੰਤਾਨ ਸੁਖ ਪ੍ਰਾਪਤ ਹੁੰਦਾ ਹੈ। ਕਈ ਲੋਕਾਂ ਨੇ ਇਸ ਮੌਕੇ ‘ਤੇ ਵ੍ਰਤ ਰੱਖਿਆ ਅਤੇ ਸਵੇਰ ਤੋਂ ਹੀ ਗਊਸ਼ਾਲਾਵਾਂ ਵਿੱਚ ਦਰਸ਼ਨ ਕਰਕੇ ਆਸ਼ੀਰਵਾਦ ਲਿਆ।
ਕਾਮਧੇਨੂ ਗਊਸ਼ਾਲਾ ਦੇ ਪ੍ਰਬੰਧਕਾਂ ਨੇ ਦੱਸਿਆ ਕਿ ਹਰ ਸਾਲ ਗੋਪਾਲ ਅਸ਼ਟਮੀ ‘ਤੇ ਸ਼ਰਧਾਲੂਆਂ ਦੀ ਵੱਡੀ ਗਿਣਤੀ ਇੱਥੇ ਪਹੁੰਚਦੀ ਹੈ। ਗਊਆਂ ਨੂੰ ਸਜਾਇਆ ਜਾਂਦਾ ਹੈ, ਉਨ੍ਹਾਂ ਦੇ ਸਿੰਗਾਂ ਤੇ ਮਾਲਾਵਾਂ ਪਾਈਆਂ ਜਾਂਦੀਆਂ ਹਨ ਅਤੇ ਪੂਰੇ ਦਿਨ ਭਗਵਾਨ ਕ੍ਰਿਸ਼ਨ ਦੇ ਭਜਨ ਗੂੰਜਦੇ ਰਹਿੰਦੇ ਹਨ। ਉਨ੍ਹਾਂ ਕਿਹਾ ਕਿ ਗਊ ਸੇਵਾ ਅਤੇ ਗਊ ਪੂਜਾ ਦੇ ਨਾਲ-ਨਾਲ ਇਸ ਦਿਨ ਮਨੁੱਖਤਾ ਦੀ ਸੇਵਾ ਕਰਨ ਦਾ ਵੀ ਸੁਨੇਹਾ ਦਿੱਤਾ ਜਾਂਦਾ ਹੈ।
ਉਨ੍ਹਾਂ ਕਿਹਾ ਕਿ ਅੱਜ ਦੇ ਦਿਨ ਦਾ ਸੰਦੇਸ਼ ਹੈ ਕਿ ਭਗਵਾਨ ਕ੍ਰਿਸ਼ਨ ਵਾਂਗ ਗਊਆਂ ਅਤੇ ਜੀਵਾਂ ਨਾਲ ਪਿਆਰ ਕਰਨਾ, ਉਨ੍ਹਾਂ ਦੀ ਸੇਵਾ ਕਰਨਾ ਹੀ ਅਸਲ ਧਰਮ ਹੈ। ਗੋਪਾਲ ਅਸ਼ਟਮੀ ਮਨੁੱਖਤਾ, ਦਾਨ ਅਤੇ ਭਗਤੀ ਦਾ ਤਿਉਹਾਰ ਹੈ ਜੋ ਜੀਵਨ ਵਿੱਚ ਸ਼ਾਂਤੀ ਅਤੇ ਪਵਿੱਤਰਤਾ ਲਿਆਉਂਦਾ ਹੈ।
